நிலவுக்கு என்மேல் என்னடி கோபம் விமர்சனம்

நாயகன் பவிஷ் நாராயண் பெற்றோர்களான சரண்யா பொன்வண்ணன் மற்றும் ஆடுகளம் நரேன் காதல் பிரேக்-அப் ஆன தங்கள் மகனுக்கு வேறு பெண்ணை திருமணம் செய்து வைக்க அவர்களுடன் அந்தப் பெண்ணின் வீட்டிற்கு வரும்படி கட்டாயப்படுத்துகிறார்கள். தயக்கத்துடன், செல்லும் பவிஷ் அங்கு தனது பள்ளித் தோழி பிரியா பிரகாஷ் வாரியரை சந்திக்கிறார். திருமணம் குறித்து முடிவெடுப்பதற்கு முன்பு இருவரும் ஒருவரையொருவர் தெரிந்து கொள்ள ஒரு வாரம் டேட்டிங் செய்த பிறகு திருமணத்தை பற்றி முடிவு செய்யலாம் என்று பிரியா பிரகாஷ் சொல்ல இருவரும் டேட்டிங் செல்கிறார்கள். பின்னர் அவர்கள் இருவரும் தங்கள் இறுதி டேட்டிங்கிற்கு பிறகு திருமணம் செய்து கொள்ளும் தருவாயில், சில மாதங்கள் கழித்து அனிகா சுரேந்திரன் திருமண அழைப்பிதழ் பவிஷ்க்கு கிடைக்கிறது.அதை பிரியா பிரகாஷ் வாரியரிடம் காட்டும் போது ப்ரியா பவிஷிடம் அவரது பிரேக்-அப் காதல் பற்றி கேட்க,பவிஷ் தனது பிரேக்-அப் காதலை பற்றி சொல்ல தொடங்கும்போது ஃப்ளாஷ்பேக். தங்கள் நெருங்கிய நண்பன் மற்றும் தோழியின் பார்ட்டியில் பவிஷ் அனிகா சுரேந்திரனை சந்திக்கிறார். அனிகா ஒரு சாப்பாட்டு விரும்பி.அனிகாவை பார்த்த முதல் பார்வையிலேயே பவிஷ் காதல் வயப்படுகிறார்.
பவிஷின் சமையல் திறன் மற்றும் அரவனைப்பு பார்த்து அனிகாவும் காதலில் விழுகிறார். பவிஷை தனது பணக்கார தந்தை சரத்குமாரிடம் அறிமுகம் செய்து வைக்கிறார் அனிகா. அனிகாவின் தந்தைக்கு பவிஷை சுத்தமாக பிடிக்கவில்லை என்பதால் இவர்களின் காதலுக்கு எதிர்ப்பு தெரிவிக்கிறார்.அனிகாவின் வர்ப்புருத்தலின் பேரில் சரத்குமார் பவிஷிடம் பழகுவதற்கு கால அவகாசம் கேட்கிறார். இந்த சூழலில் அனிகாவின் தந்தைக்கு நுரையீரல் புற்றுநோய் இருப்பதாகவும், அவர் இறுதி கட்டத்தில் இருப்பதாகவும் தெரியவந்தபோது, பவிஷ் நிலமையை புரிந்து அமைதியாக அனிகாவை பிரிந்த தனது பிரிவின் கதையைச் சொல்கிறார்.இந்த திருமணத்திற்கு செல்ல பிரியா பவிஷை கோவாவிற்கு அழைக்கிறார்.
அங்கு பவிஷ்,மேத்யூ தாமஸ்,அனிகா சுரேந்திரன்,ரபியா கட்டூன்,ரம்யா ரங்கநாதன்,வெங்கடேஷ் மேனன்,பிரியா பிரகாஷ் வாரியர் மற்றும் சித்தார்த்த சங்கர் போன்றவர்கள் கொண்ட மிகவும் சுவாரஸ்யமான மற்றும் இளம் குழுவால் உணர்ச்சிகளும் நிச்சயமற்ற தன்மைகளும், தீர்க்கப்படாத உணர்வுகளை எதிர்கொள்ளும் போது கணிக்க முடியாத எதிர்பார்க்க முடியாத பிரேக்-அப் காதல் என்ன ஆகிறது என்பதே படத்தின் மீதிக்கதை.
பவிஷ் திரையில் பார்க்கும் போது தனுஷை போலவே தோற்றம் அளிக்கின்றார்.நடிப்பில் டயலாக் டெலிவரி,நடனம் என அனைத்திலும் இளம் வயது தனுஷை போலவே அசத்தி உள்ளார் வாழ்த்துக்கள்.
சரத்குமார்,சரண்யா பொன்வண்ணன் ஆடுகளம் நரேன் ஆகியோரின் அற்புதமான நடிப்பு கதைக்கு மேலும் வலு சேர்த்துள்ளது.
மற்ற கதாபாத்திரங்களான அனிகா சுரேந்திரன்,மேத்யூ தாமஸ்,பிரியா பி.வாரியர்,வெங்கடேஷ் மேனன், ரம்யா ரங்கநாதன், சித்தார்தா ஷங்கர், ராபியா கதூன்,உதய் மகேஷ்,ஸ்ரீதேவி உட்பட அனைவரும் சிறப்பான நடிப்பால் தங்கள் பாத்திரங்களுக்கு பலம் சேர்த்துள்ளனர்.
ஒளிப்பதிவாளர் லியோன் பிரிட்டோவின் ஒளிப்பதிவும் ஜி.வி. பிரகாஷ் குமாரின் இசையும் கதைக்கு மேலும் வலு சேர்த்துள்ளது.
ஒரு உணர்ச்சிபூர்வமான பின்னணியுடன் கூடிய புத்துணர்ச்சியூட்டும் நகைச்சுவை மற்றும் யதார்த்தத்துடன் ஒரு வித்தியாசமான கதையை இளமை துளள்ளலுடன் தந்திருக்கும் இயக்குநர் தனுஷை பாராட்டியே ஆகவேண்டும்.
நிலவுக்கு என் மேல் என்னடி கோபம் இனிமை.