“பயணிகள் கவனிக்கவும்”-விமர்சனம்

“பயணிகள் கவனிக்கவும்”-விமர்சனம்

இன்றைய வாழ்க்கை சூழ்நிலையில் செல்போன்ஒவ்வொறுவருக்கும் எவ்வளவு முக்கியம் அதனால் ஒருவரின் வாழ்க்கை எந்த அளவு பாதிக்கப்படுகிறது என்பதை சொல்லி இருக்கும் படம் தான் “பயணிகள் கவனிக்கவும்”.
கண்ணில் படும் காட்சிகளை எல்லாம் செல்போனில் படம்பிடித்து அதன் உண்மைத்தன்மை என்னவென்று தெரிந்து கொள்ளாமல் கமெண்டுகளும் மீம்ஸ்களும் போட்டு அதை அடுத்தவருக்கு அனுப்பிக் கொண்டிருப்பதால் சம்பந்தப்பட்டவர்கள் வாழ்வில் எத்தகைய விளைவுகளை சந்திக்க வேண்டி இருக்கிறது என்று சொல்லும் படம்.
சாதாரண நடுத்தர வர்க்கத்து குடும்பத் தலைவனாக நடிகர் விதார்த் நடித்திருக்கிறார்.  காது கேளாத வாய் பேச இயலாத அந்தப் பாத்திரத்தை அற்புதமாக நடித்திறுக்கிறார் விதார்த்.
அவர் பேசுவது நமக்கு புரியாமல் புரிய வேண்டும் என்கிற அளவுகோலில் இம்மியளவும் பிசகாமல் வார்த்து எடுத்து அந்தப் பாத்திரமாகவே வாழ்ந்திருக்கும் விதார்த் கிளைமாக்ஸ் காட்சியில் தன் வாழ்வை தன்னையறியாமல் சிதைத்தவரை மன்னிக்கும் இடத்தில் மலைக்க வைத்திருக்கிறார்.
அவரது மனைவியாக வரும் லட்சுமி பிரியாவுக்கு சிறிய வேடம்தான் என்றாலும் கிடைத்த இடத்தில் எல்லாம் தன் இயல்பான நடிப்பினால் ரசிக்க வைத்திருக்கிறார்.
விதார்த்தின் குழந்தைகளாக நடித்திருக்கும் இருவரும் அற்புதமாக நடித்துள்ளனர்
விதார்த்துக்கு நிகராக இன்னொரு நாயகனாக வருகிறார் கருணாகரன். துபாய் ரிட்டன் ஆக வரும் அவர் தன் சிறு வயது தோழியை ஒருதலையாக காதலித்து அவளது அப்பாவிடம் பெண் கேட்கப் போகும் இடத்தில் வயிறு வலிக்க சிரிக்க வைத்திருக்கிறார்.
அவர் இயல்பாக செய்யும் ஒரு தவறு விதார்த்  வாழ்க்கையை எப்படி புரட்டி போடுகிறது என்பதே கதையாக இருக்க அந்த உண்மை தெரியும் நேரத்திலிருந்து குற்ற உணர்ச்சியிலும், தான் செய்த பாவம் தன்னை திரும்பி வந்து தாக்குமோ என்ற அச்சத்திலுமாக நகைச்சுவை தாண்டி உருக்கமாகவும் நடித்து சிறந்த குணச்சித்திர நடிகராகவும் அடையாளம் தெரிகிறார் கருணாகரன்.
அவரது காதல் மனைவியாக வரும் மாசம் சங்கரும் அழகாகவும் அளவாகவும் நடித்துள்ளார் இன்றைய சமூகத்திற்கு தேவையான ஒரு செய்தியை சொல்லி அலுப்பில்லாமல் அதே நேரத்தில் அழகாகவும் திரைக்கதை அமைத்து இந்த படத்தை ரசிக்கும்படி தந்திருக்கிறார் இயக்குனர் எஸ்.பி.சக்திவேல். அங்கங்கே காட்சிகள் மெதுவாக நகர்வதைக் குறைத்திருந்தால் இன்னும் விறுவிறுப்பு கூடியிருக்கும். அதேநேரம் கல்யாணம் ஆகி பல நாட்கள் ஆகியும் சுண்டு விரல் கூட மனைவி மேல் படாமல் இருக்கும் கருணாகரன் கடைசியில் பிரச்சனை தீர்ந்து மனைவியுடன் முதலிரவைக் கொண்டாடினார் என்று முடித்திருந்தால் இன்னும் ரசிக்கும்படி இருந்திருக்கும்.
கருணாகரனின் தாய், தங்கை, நண்பர்களாக வரும் முகங்களும் இயல்பாக நடித்து பெயர் வாங்கிக் கொள்கிறார்கள். வித்தியாசமான தண்டனை கொடுக்கும் இன்ஸ்பெக்டர் பிரேமின் பாத்திரமும் யதார்த்தம்
ஒளிப்பதிவு சென்னையில் பல கோணங்களில் காட்டி ரசிக்க வைத்திருக்கிறது. மெட்ரோ ரயில் வந்த பிறகு அதை அதிகமாக பயன்படுத்திக் கொண்ட படம் இதுவாகத்தான் இருக்கும். கிட்டத்தட்ட மெட்ரோ ரயிலும் இதில் ஒரு பாத்திரமாக ஆகியிருக்கிறது.
படத்தின் தன்மைக்கேற்ப இந்த படத்தில் பாடல்களும் சரி, பின்னணி இசையும் சரி… வலுவானதாக உள்ளது
ஆஹா ஓடிடி தளத்தில் நேரடியாக ஒளிபரப்பாகும் இந்த படம் ஒட்டு மொத்த குடும்பத்தினரும் பார்த்து ரசிக்கும் படி அமைந்துள்ளது
மொத்தத்தில் இந்த பயணிகள் கவனிக்கவும் திரைப்படம் அனைவரும் கவனிக்க வேண்டிய ஒரு படம்